Ish-presidenti Ilir Meta do të paraqitet sot në orën 11:30 në Gjykatën e Posaçme kundër Korrupsionit dhe Krimit të Organizuar, ku do të kërkojë zbutjen e masës së sigurisë që i është caktuar në kuadër të hetimeve ndaj tij nga SPAK.
Ndërkohë, burime nga organi i akuzës bëjnë me dije se hetimet kanë zbuluar një episod të ri të dyshuar korrupsioni, ku janë të përfshirë Meta dhe ish-bashkëshortja e tij, Monika Kryemadhi.
Sipas informacioneve të siguruara, një kartë tjetër bankare, përveç asaj që është përmendur më herët, është identifikuar si mjet pagesash i përdorur nga çifti për blerje dhe shpenzime personale.
Karta në fjalë rezulton se është vënë në dispozicion nga biznesmeni Adrian Shatku, i njëjti person që më parë rezultoi të kishte dhënë për përdorim edhe një kartë tjetër “American Express”.
Hetuesit dyshojnë se këto përfitime përbëjnë formë të fshehur financimi apo përfitimi të paligjshëm në dëm të interesit publik.
Ndërkohë, SPAK është drejt përfundimit të saktësimit të akuzës për lobimin e ish-partisë LSI në SHBA, pasi nga letërporositë e ardhura nga jashtë, janë siguruar të dhëna shtesë që hedhin dritë mbi pagesat dhe kontratën e lobimit.
