Për të siguruar rendin dhe sigurinë gjatë sezonit veror 2025, Policia e Shtetit ka hartuar një plan të detajuar masash që po zbatohet në të gjithë vendin.
Ky plan përqendrohet në garantimin e sigurisë në zonat bregdetare, liqenore dhe lumore, menaxhimin e trafikut në pikat kufitare, parandalimin e aksidenteve rrugore dhe aktiviteteve kriminale, si dhe zbatimin e orarit për ndalimin e muzikës në ambiente publike.
Një tjetër fokus është ruajtja e mjedisit dhe mbrojtja e zonave turistike.
Ndryshe nga viti i kaluar, shërbimi 12-orësh do të aplikohet vetëm në zonat bregdetare, ku do të shtohen forca shtesë policore që do të paguhen sipas ligjit në fuqi.
Për zbatimin e këtij plani, në terren janë angazhuar:
• Dhjetëra automjete dhe motoçikleta për të rritur kapacitetin e reagimit dhe gatishmërinë;
• Policë me biçikleta që patrullojnë në plazhe, duke forcuar prezencën dhe mbështetjen ndaj pushuesve;
• Njësia Policore Detare, e cila monitoron dhe ndëshkon lundrimet e paligjshme brenda zonave të ndaluara;
• Dronë për kontrollin e perimetrit të plazheve dhe për evidentimin e shkeljeve rrugore.
Policia Kufitare ka shtuar sportelet dhe personelin në pikat kryesore të kalimit kufitar për të menaxhuar më mirë fluksin e turistëve.
Kontrolli është rritur në kufirin e gjelbër dhe në kufirin blu për të parandaluar kalimet e paligjshme dhe aktivitetet kriminale.
Policia Rrugore do të jetë prezente 24 orë në 7 ditë në të gjitha akset kryesore dhe zonat urbane, duke përdorur pajisjet inteligjente, dronët dhe alkooltestuesit.
Janë shtuar patrullat në zonat turistike për të parandaluar aksidentet dhe për të siguruar qarkullimin e lirë të automjeteve.
Nga data 16 qershor deri më 15 shtator 2025, do të kufizohet qarkullimi i automjeteve të rënda për transport mallrash gjatë fundjavave dhe ditëve festive.
Për zbatimin efektiv të masave, Policia po bashkëpunon ngushtë me agjencitë turistike për regjistrimin dhe pajisjen e mjeteve lundruese, kryetarët e fshatrave dhe pushtetin vendor, vrojtuesit e plazheve, emergjencat civile dhe shëndetësore, si dhe shërbimet zjarrfikëse.
Operacioni “Plazh i lirë” vijon për lirimin e hapësirave bregdetare të zaptuara në mënyrë të paligjshme.
Gjithashtu, do të ushtrohen kontrolle të rrepta për respektimin e orarit të muzikës, ku policia tashmë ka në dispozicion aparatet për matjen e nivelit të zhurmës dhe do të ndëshkojë shkelësit.
