Në datën 8 korrik, në orën 12:00, Gjykata e Lartë do të zhvillojë një seancë në dhomë këshillimi për shqyrtimin e rekursit të paraqitur nga Erion Veliaj dhe Elman Abule, të cilët kërkojnë ndryshim të masës së sigurisë ndaj tyre.
Relatore e çështjes është gjyqtarja Albana Boksi, ndërsa trupën gjykuese e përbëjnë edhe gjyqtarët Medi Bici dhe Sokol Binaj.
Të dy të pandehurit janë nën hetim nga SPAK për vepra penale të rënda dhe kërkojnë zëvendësimin e masave aktuale të sigurisë, “arrest me burg” për Veliajn dhe “arrest në shtëpi” për Abulen.
Veliaj nën akuzë për korrupsion, pastrim parash dhe fshehje pasurie
Kryetari i Bashkisë së Tiranës, Erion Veliaj, u arrestua më 10 shkurt në ambientet e bashkisë, si i dyshuar për kryerjen e disa veprave penale, përfshirë “korrupsion pasiv i funksionarëve të lartë publikë”, “pastrim të produkteve të veprës penale” dhe “fshehje apo deklarim të rremë të pasurisë”.
Bashkëshortja e tij, Ajola Xoxa, është vendosur nën masën “detyrim paraqitje”.
Sipas SPAK, Veliaj dhe persona të tjerë të lidhur me të, përfshirë bashkëshorten, kanë ngritur një skemë të strukturuar që synonte përfitime të parregullta përmes shpërdorimit të fondeve publike të Bashkisë së Tiranës.
Prokuroria e Posaçme pretendon se kjo skemë është përdorur për pasurim personal dhe të familjes, përmes veprimeve të fshehta dhe të paligjshme.
Gjatë seancës në Gjykatën e Lartë, do të shqyrtohen argumentet e paraqitura nga mbrojtja e Veliajt dhe Abules, si dhe kundërshtimet e prokurorëve të SPAK, të cilët pritet të kërkojnë lënien në fuqi të masave të sigurisë.
