Rrjeti i Lajmeve të Republikës Islamike të Iranit, pjesë e transmetuesit shtetëror IRIB, pretendon se ka qenë objektiv i një sulmi izraelit, sipas raportimeve të Reuters.
Lajmi vjen pak orë pas deklaratave kërcënuese të ministrit izraelit të Mbrojtjes, Israel Katz, i cili paralajmëroi se transmetuesi shtetëror iranian “është gati të zhduket”.
“Megafoni i propagandës dhe i nxitjes iraniane është në prag të zhdukjes,” u shpreh Katz, duke iu referuar gjithashtu evakuimit të detyruar të banorëve nga pjesë të Distriktit 3 të Teheranit, një zonë ku ndodhet edhe selia e IRIB-it.
Ende nuk ka konfirmim zyrtar nga Izraeli mbi ndonjë goditje direkte ndaj selisë së transmetuesit iranian, por retorika në rritje dhe evakuimet përreth zonës së IRIB-it kanë shtuar tensionin.
Kjo përbën një tjetër përshkallëzim në konfliktin e vazhdueshëm mes dy vendeve.
