Një tjetër krim makabër ka tronditur opinionin publik në Itali, këtë herë në qytetin Tolentino të provincës së Maceratës.
Gentiana Hudhra, 45 vjeçe, u vra mizorisht me thikë nga ish-bashkëshorti i saj, Nikollaq Hudhra, i cili iu afrua me një skuter dhe e goditi me një mjet prerës me teh 30 centimetra të gjatë. Ngjarja ndodhi të shtunën, në rrugë të hapur, duke lënë të tmerruar kalimtarët dhe komunitetin lokal.
Pas krimit, autori u ul në një stol pranë vendngjarjes, duke pritur arrestimin.
Pikërisht ky stol është kthyer tani në simbol të kujtesës për Gentianën: është lyer me të kuqe dhe mban mbishkrimin “Në kujtim të Gentianës”. Bashkia e qytetit, nën drejtimin e kryebashkiakut Mauro Sclavi, ka ndërmarrë një nismë sensibilizuese përmes një demonstrate që do të zhvillohet mbrëmjen e së martës nën moton “Për Gentianën”.
Marshimi do të nisë në Piazza della Libertà dhe do të përfundojë në Viale Benadduci me fjalime nga zyrtarë të lartë, përfshirë prefekten e Maceratës, presidentin e rajonit dhe përfaqësues të kishës.
Rasti i Gentianës nuk është i vetmi, Italia është tronditur nga disa vrasje të tjera të rënda ndaj grave.
Më 4 qershor, një tjetër ngjarje e rëndë u bë publike: trupi i pajetë i Maria Denisa Paun, një 30-vjeçare rumune që punonte si eskortë, u gjet i masakruar në një zonë të pyllëzuar në Montecatini Terme, pranë një shtëpie të braktisur.
Trupi i saj ishte i djegur pjesërisht dhe pa kokë. Denisa, e njohur me emrin “Adas”, ishte zhdukur më 15 maj në qytetin Prato.
Hetimet çuan në arrestimin e Vasile Frumuzache, një bashkëkombas 32-vjeçar, roje sigurie dhe baba i dy fëmijëve.
Pamjet filmike e shfaqin duke hyrë në hotelin ku qëndronte Denisa dhe më pas duke dalë me një valixhe të bardhë, brenda së cilës dyshohet se ndodhej trupi.
Autori pranoi krimin dhe deklaroi se viktima e kishte shantazhuar për shkak të martesës së tij, duke i kërkuar 10 mijë euro për të mos e zbuluar. Më pas e kishte vrarë, i kishte prerë kokën dhe kishte tentuar të digjte trupin.
Ndërsa më 2 prill, policia në Romë zbuloi një tjetër skenë të tmerrshme: trupi i 24-vjeçares Ilaria Sula u gjet brenda një valixheje, pasi ishte zhdukur më 25 mars.
Ish-partneri i saj, me origjinë filipinase, pranoi vrasjen, duke treguar se e kishte therur me thikë në banesën e tij dhe e kishte fshehur trupin në makinë. Ai madje kishte ndaluar për të blerë cigare ndërkohë që kufoma ndodhej në automjet.
Në fund të majit, një vajzë vetëm 14 vjeçe, Martina Carbonaro, u gjet e vrarë në një ndërtesë të braktisur në Napoli. Trupi i saj ishte mbuluar me një dyshek. I dyshuari, Alessio Tucci, 18 vjeç, pranoi se e kishte goditur për vdekje me gurë pas një konflikti që pasoi ndarjen e tyre.
Këto ngjarje tronditëse e nxjerrin në pah një realitet të dhimbshëm dhe alarmues: dhuna ndaj grave në Itali është në rritje dhe gjithnjë më brutale. Ato nuk janë thjesht statistika, por gra dhe vajza me emra, histori dhe ëndrra të shkatërruara nga indiferenca, kontrolli dhe urrejtja.
Institucionet të reagojnë më shpejt, të ndërhyjnë më herët dhe të mos i lejojnë më asnjë Gentianë, Denisa, Ilaria apo Martina të shndërrohen në emra mbi stola të kuq.
