Seanca gjyqësore për çështjen “Sterilizimi” u shty këtë të mërkurë, pasi mungesa e dy avokatëve mbrojtës pengoi shpalljen e pretencës nga prokurorët e SPAK.
Prokurorët Edvin Kondili dhe Ened Nakuçi kërkuan shtyrjen e procesit, duke argumentuar se leximet përfundimtare duhet të bëhen në praninë e plotë të të gjithë palëve.
Në seancën e mëparshme, 8 prej të pandehurve pranuan të gjykohen me procedurë të shkurtuar, ndërsa ish-ministri i Shëndetësisë, Ilir Beqaj, vendosi të përballet me një proces të rregullt gjyqësor, duke kërkuar shqyrtimin e plotë të provave të paraqitura nga SPAK.
Gjykata vendosi që seanca e radhës të zhvillohet më 25 qershor, në orën 13:00, ku pritet që prokuroria të shpallë konkluzionet përfundimtare për të pandehurit që kanë zgjedhur gjykimin e shkurtuar.
