Një tjetër krim i rëndë tronditi opinionin publik në Itali, ku trupi i pajetë i një 30-vjeçareje rumune u gjet i masakruar në rrethana makabre.
Maria Denisa Paun, e njohur me emrin “Adas”, punonte si eskortë dhe kishte humbur kontaktet me familjen më 15 maj në qytetin Prato.
Trupi i saj, i djegur pjesërisht dhe pa kokë, u zbulua më 4 qershor në një zonë të pyllëzuar në Montecatini Terme, pranë një shtëpie të braktisur.
Hetimet e karabinierëve çuan në arrestimin e një bashkëkombasi të saj, Vasile Frumuzache, 32 vjeç, roje sigurie dhe baba i dy fëmijëve.
Pamjet e kamerave e tregojnë atë duke hyrë në hotelin ku qëndronte Denisa dhe më pas duke dalë me një valixhe të bardhë, në të cilën ndodhej trupi i viktimës.
Arrestimi u bë i mundur falë gjurmimit të GPS-it të makinës së autorit dhe analizës së të dhënave telefonike.
Në dëshminë e tij, Frumuzache tha se kishte kryer vrasjen pasi viktima e kishte shantazhuar me faktin që ai ishte i martuar, duke i kërkuar 10 mijë euro për të mos e zbuluar.
Ai pranoi se e kishte vrarë, i kishte prerë kokën dhe më pas kishte djegur pjesërisht trupin dhe kokën në një kopsht.
Ky krim i rëndë i shtohet një vale rastesh të ngjashme të raportuara kohët e fundit në Itali, ku dhuna ndaj grave ka marrë trajta të tmerrshme.
Rast pas rasti: një zinxhir vrasjesh mizore
Më herët, më 2 prill, policia gjeti trupin e 24-vjeçares Ilaria Sula brenda një valixheje në Romë, pas zhdukjes së saj më 25 mars.
Ish-i dashuri i saj filipinas pranoi vrasjen, duke treguar se e kishte therur me thikë në apartamentin e tij dhe më pas fshehur trupin. Ai madje ndaloi rrugës për të blerë cigare, ndërsa kufoma ndodhej në makinë.
Një tjetër viktimë, vetëm 14 vjeçe, u gjet e vrarë në Napoli. Martina Carbonaro ishte zhdukur më 26 maj dhe u zbulua disa ditë më pas e mbuluar me një dyshek në një ndërtesë të braktisur. I dyshuari kryesor, Alessio Tucci, 18 vjeç, pranoi se e kishte vrarë gjatë një sherri pas ndarjes, duke e goditur me gurë në kokë.
Në të tre rastet, viktimat kishin shfaqur shenja frike përpara zhdukjes. Denisa kishte paralajmëruar familjen se ndjente rrezik, por në mesazhin e fundit i kishte thënë nënës: “Jam mirë, do shihemi të shtunën.” Një ndjesi e rreme sigurie që fatkeqësisht u shua në mënyrë tragjike.
Ngjarjet ngrejnë alarmin për përmasat e dhunës ndaj grave në Itali dhe nevojën për ndërhyrje më të hershme nga institucionet.
