Një tjetër dëshmi tronditëse e një të penduari në Itali ka nxjerrë në dritë detaje të reja mbi trafikun e drogës dhe armëve të zhvilluar midis Shqipërisë dhe brigjeve të Garganos, në jug të Italisë.
Gianluigi Troiano, 34 vjeç, i njohur me nofkën “U’ Minorenne”, tashmë bashkëpunëtor i drejtësisë, ka rrëfyer për rolin që ka pasur në rrjetin kriminal të lidhur me grupet shqiptare dhe klanet mafioze italiane.
Sipas tij, zbarkimet nga Shqipëria ishin të planifikuara dhe të garantuara nga figura të njohura të krimit. Një prej tyre, Omar Trotta, i vrarë në vitin 2017, përmendet si garantuesi i marrëveshjeve me shqiptarët.
Ai kishte udhëtuar në Shqipëri për të siguruar besimin mes palëve pas një incidenti ku dy shtetas shqiptarë ishin arrestuar në Vieste me drogë dhe armë.
Në një nga zbarkimet, një ngarkesë prej 1,200 kilogramë marijuanë mbërriti në Pugnochiuso. Shqiptarët që e shoqëronin ngarkesën, pas qëndrimit në një hotel në Ruggiano, u larguan drejt veriut me autobus, ndërsa droga u transportua në Torino, ku u dorëzua një grupi tjetër shqiptar që menaxhonte një punishte.
Në një tjetër rast, një zbarkim i përbashkët me dy anije, një jaht dhe një gomone solli në breg 4,000 kilogramë drogë, që u shkarkua në zonën e Peschici-t dhe u magazinua në një shtëpi fshati.
Nga kjo sasi, organizatorët morën si kompensim 150 kilogramë marijuanë dhe dy armë automatike të modifikuara, që sipas rrëfimit të Troiano-s, u testuan më pas në zonën e Ruggiano-s.
Troiano përmend gjithashtu kalimin e tij nga klani Iannoli-Perna te organizata rivale e Raduanos, një tjetër figurë tashmë e penduar. Ai rrëfen për grabitje brenda botës së krimit, ku pas një tradhtie, ndihmoi Marco Raduanon të lokalizonte dhe të vidhte drogën që ishte fshehur në një garazh në kështjellën e këtij të fundit.
Droga më vonë përfundoi në Molinella, ku u sekuestrua nga autoritetet.
Rrëfimi përfshin edhe disa figura të tjera kyçe të rrjetit kriminal. Tommaso Tomaiuolo përshkruhet si një nga vrasësit e klanit Miucci-Perna. Roberto Prencipe, i përmendur nga një tjetër i penduar si një nga autorët e masakrës së San Marcos, përmendet si kontakti për furnizimet me armë, drogë dhe kryerjen e vrasjeve.
Sipas Troiano-s, Prencipe ishte shumë i kujdesshëm, nuk përdorte telefona apo automjete dhe preferonte kontaktin fizik në banesë. Ai mbante të gjithë marijuanën nga zbarkimet dhe më pas e shpërndante përmes lidhjeve të tij në rrjetin e trafikantëve.
Dëshmia e Troiano-s përforcon akuzat për një bashkëpunim të ngushtë mes grupeve kriminale shqiptare dhe atyre italiane, të cilat kanë ndërtuar një linjë trafiku “Coast to Coast” që përfshin drogë, armë dhe dhunë, të mbështetur në një sistem të mirëorganizuar logjistik dhe garancish.
