Prokuroria e Posaçme Kundër Korrupsionit dhe Krimit të Organizuar ka zhvilluar një operacion të gjerë për goditjen e një skeme të organizuar kontrabande me cigare.
Në kuadër të këtij aksioni janë lëshuar 15 urdhërarreste, të cilat janë ekzekutuar nga Policia e Shtetit, përfshirë doganierë, biznesmenë dhe shtetas të huaj të përfshirë në skemën kriminale.
Gjithashtu, janë firmosur edhe 21 urdhra ndalimi për dalje jashtë territorit të Shqipërisë, me qëllim pengimin e arratisjes së personave nën hetim.
Në këtë operacion janë arrestuar dy doganierë, ndërsa masa të tjera sigurie si arrest shtëpie dhe detyrim për t’u paraqitur janë caktuar ndaj disa të dyshuarve, përfshirë edhe një biznesmen.
Hetimi përqendrohet në veprime kriminale që përfshijnë korrupsion, kontrabandë në kuadër të një grupi të strukturuar kriminal, evazion fiskal dhe fshehje të ardhurash.
Burimet nga Prokuroria bëjnë me dije se disa nga personat për të cilët janë lëshuar urdhërarreste ndodhen jashtë vendit, ndërsa hetimet vijojnë për zbardhjen e detajeve të tjera të këtij rasti.
Ky aksion vjen pas një tjetër megaoperacioni të SPAK, ku u godit një grup i rrezikshëm kriminal i përfshirë në trafikun ndërkombëtar të drogës.
