Një përballje e fortë në arenën e arteve marciale mikse, në “MBW Park” të Mynihut, përfundoi me një moment dramatik për sportistin shqiptar Arijan Topallaj, i cili humbi ndjenjat gjatë raundit të tretë të ndeshjes ndaj irlandezit Denis Frimpong.
Sfida u dominua nga Frimpong, i cili arriti fitoren me nokaut teknik në sekondën e 44-të të raundit të tretë. Sipas statistikave zyrtare, Topallaj u godit mbi 100 herë, ndërsa arriti të kthejë vetëm 53 goditje, përpara se të dorëzohej si pasojë e lodhjes së skajshme dhe presionit të pandërprerë.
Pamjet nga vendngjarja tregojnë momentin kur Topallaj u nxor me barelë nga kafazi dhe u transportua menjëherë në spital.
Fatmirësisht, burime pranë organizatorëve kanë konfirmuar se gjendja e tij tashmë është e stabilizuar dhe ai ndodhet jashtë rrezikut për jetën.
Pas rikuperimit, vetë Topallaj reagoi në rrjetet sociale me një mesazh të ndjerë: “Falënderimi i qoftë Allahut për gjithçka. Çfarë sporti i çmendur që bëj, por e dua këtë gjë me gjithë shpirt. Edhe pse mbrëmja nuk shkoi siç ishte planifikuar, një gjë mund ta them me zemër të pastër: E lashë gjithçka në kafaz. Që nga raundi i dytë, trupi im nuk më dëgjoi më. U thye fizikisht. Nuk e di në fund të ditës pse ndodhi kjo, por një gjë e di: Kam dhënë gjithçka në përgatitje dhe në luftë. Ndonjëherë është thjesht e pashpjegueshme – pse, për çfarë, nga se. Por Zoti ka plane më të mëdha sesa mund t’i kuptojmë ndonjëherë. Faleminderit ekipit tim, vëllezërve të mi, familjes sime dhe secilit prej jush që qëndroni pas meje. Keni qenë aty që nga fillimi dhe vazhdoni të jeni, pavarësisht gjithçkaje. Për këtë nuk kam fjalë, vetëm mirënjohje. Koha jonë do të vijë. Inshallah. Si do të vazhdojë më tej? Nuk e di ende. Kjo do të shihet në javët në vijim. Shihemi së shpejti, vetëm dashuri për të gjithë. Faleminderit nga zemra”.
Topallaj, i njohur për stilin e tij të pathyeshëm në kafaz, mbetet një prej emrave më të ndjekur të MMA-së shqiptare në arenën ndërkombëtare.
