Kryeministri britanik Keir Starmer u përball me refuzim të prerë gjatë qëndrimit në Tiranë, ndërsa tentoi të promovonte një plan të ri për frenimin e emigracionit të paligjshëm.
Mediat britanike, përfshirë “Daily Mail”, e përshkruan situatën si një “poshtërim diplomatik”, pasi propozimi i tij për ngritjen e qendrave të azilit jashtë Britanisë në modelin e marrëveshjes me Ruandën u përjashtua kategorikisht nga Kryeministri Edi Rama.
Në konferencën e përbashkët për shtyp, Rama sqaroi se Shqipëria nuk është e gatshme të zgjerojë skemat e ngjashme me ato që ka me Italinë, duke theksuar se marrëveshja me Romën është një rast i veçantë, i ndërtuar mbi lidhje të veçanta politike dhe kontekst gjeografik të favorshëm.
“Kam qenë i qartë që në fillim: marrëveshja me Italinë është një përjashtim, jo një model që do të aplikohet me vende të tjera,” u shpreh ai.
Përballë këtij qëndrimi, burime nga kabineti i Starmer u përpoqën të zbusin situatën, duke theksuar se Londra po zhvillon bisedime paralele me vende të tjera të rajonit si Serbia, Bosnja dhe Maqedonia e Veriut.
Përpara vizitës në Tiranë, Starmer kishte deklaruar gatishmërinë e qeverisë britanike për të kompensuar financiarisht vendet që do të pranonin të strehojnë azilkërkuesit e refuzuar nga Mbretëria e Bashkuar, por në Tiranë, kjo ofertë hasi në një “jo” të qartë.
