Gjykata e Korçës ka caktuar masën e sigurisë “detyrim paraqitje” për Altin Nallbatin, vëllain e deputetit demokrat Bledjon Nallbati, në lidhje me incidentin e ndodhur disa ditë më parë në kryqëzimin e Bilishtit, ku ai dyshohet se ka goditur një drejtues mjeti të tonazhit të rëndë.
Avokati i Nallbatit, Nevzat Tarelli, bëri të ditur se ishte vetë Prokuroria e Korçës që kërkoi masën e detyrimit për t’u paraqitur në polici, kërkesë që u pranua nga gjykata.
Ndërkohë, deputeti Bledjon Nallbati ka hedhur akuza ndaj drejtorit të Policisë së Korçës dhe drejtuesit politik të PS-së në qark, Niko Peleshi, duke i fajësuar për ndërhyrje të mundshme në këtë çështje, që sipas tij çuan në ndalimin e vëllait.
Pavarësisht pretendimeve, Gjykata e Korçës ka konsideruar të ligjshëm arrestimin në flagrancë të Altin Nallbatit.
