430 milionë euro janë zhdukur nga buxheti i shtetit shqiptar përmes aferës së inceneratorëve – para që i mungojnë shëndetësisë, pensionistëve, familjeve të varfra dhe çdo qytetari të zakonshëm. E qartë se këto qindra milionë janë paguar për punë që nuk kanë nisur kurrë, në një skemë që nuk mund të ishte ngritur pa dijeninë dhe miratimin e kryeministrit Edi Rama.
Por përballë kritikave të forta, Rama nuk tërhiqet. Në një intervistë për emisionin “Të Paekspozuarit” në MCN TV, ai i quajti akuzat për inceneratorët “çmenduri totale”, dhe shpërtheu me një deklaratë që ka ngjallur reagime të shumta.
Kur iu tha se paratë e hedhura tek inceneratorët, mund t’i kishte futur tek infrastruktura, kryeministri reagoi:
“Kush ka hedhur te inceneratorët o ju hedhsha të tërëve në incenerator se më çmendët. Nuk janë para të harxhuara, ato janë projeksione për 35 vjet. Nuk janë para të harxhuara. Është një fabulë idiote. Incenerator, incenerator, incenerator.
Nuk janë as 400 as 150 në realitet. Çfarë është paguar? Shërbimi. Sa i përket strategjisë, jemi ku e ku me ku ishim më parë nga pikëpamja e grumbullimit. Kontratat me këto struktura, kanë një çmim që është qesharak në raport me çmimin real që paguhet në çdo vend të Europës.”
Sharra në kolaps, Rama: Është nën sekuestro, s’kemi ç’të bëjmë
Përballë realitetit në landfillin e Sharrës, ku mbetjet hidhen në lumenj dhe kriza është e dukshme, Rama pranoi se situata është e vështirë. Por përgjegjësinë e hodhi te fakti që vendi ndodhet nën administrim të Agjencisë së Aseteve të Sekuestruara dhe sipas tij, qeveria nuk ka dorë për të investuar apo ndërhyrë më tej pa vendim gjykate.
“Situata vështirësohet nga fakti që Sharra është në sekuestro.
Sharra administrohet nga agjenecia a aseteve të sekuestruara. Ne nuk mund të bëjmë ndonjë gjë më shumë se kaq. Administrojmë atë që është aty. Duhet të ecet me investime. Duhet hequr nga duart e atyre dhe e heq gjykata, jo ne. Administrohet nga shteti. Nuk paguhen ata, pagesat bëhen për të vazhduar puna nga agjencia shtetërore.
Problemi i këtij hotspoti që është Sharra, është shumë i lidhur e procesin… Është diçka që edhe e kemi, edhe nuk e kemi. Tërësia e mbetjeve, është komplet botë tjetër me çfarë ishte deri dje.”
Ndërsa hetimet për inceneratorët vijojnë dhe fatura e korrupsionit shtohet, shqiptarët përballen me pasojat e mungesës së transparencës, keqmenaxhimit dhe arrogancës politike. Afera e inceneratorëve mbetet plagë e hapur dhe deklaratat e fundit të kryeministrit kanë rritur tensionin publik dhe kërkesat për drejtësi.
