Emisioni investigativ “Fiks Fare” ka publikuar mbrëmjen e së mërkurës një denoncim të fortë që përfshin një kandidat për deputet në qarkun e Shkodrës. Bëhet fjalë për Gentian Ndojn, kandidat i Aleancës për Shqipërinë Madhështore, i cili rezulton të ketë pasur një kartelë në Spitalin Psikiatrik në Shkodër për diagnozën “çrregullime deluzionale”.
Sipas dokumenteve të siguruara nga redaksia e “Fiks Fare”, Gentian Ndoj, lindur në vitin 1985, ka pasur probleme neuropsikiatrike që datojnë që nga viti 2004. Një prej dokumenteve është një “fletë drejtimi për kemp” e vitit 2005, ku një komision mjekësor ka përcaktuar diagnozën “çrregullime deluzionale”. Po në atë vit, dokumenti i daljes nga Spitali Psikiatrik i Shkodrës me kartelë nr. 975 e konfirmon sërish këtë diagnozë.
Një tjetër dokument i vitit 2004 tregon se Ndoj ka qenë i shtruar në spitalin neuropsikiatrik nga data 10 deri më 17 maj, me të njëjtën diagnozë. Fiksi sjell në vëmendje se çrregullimet deluzionale, sipas Organizatës Botërore të Shëndetësisë, janë bindje të forta dhe të gabuara, që individët i mbajnë pavarësisht fakteve që i kundërshtojnë ato. Simptomat përfshijnë xhelozinë patologjike, erotomaninë, ndjesitë trupore të çuditshme, apo madhështinë e pavend.
Në dosjen e siguruar nga emisioni ndodhet edhe një dokument i lëshuar nga Ministria e Mbrojtjes, datë 12 korrik 2005, ku Gentian Ndoj cilësohet i paaftë për shërbim ushtarak për shkak të të njëjtës diagnozë. Në tetor të atij viti, ai është shtruar për një ditë në Spitalin Ushtarak në Tiranë.
Në dokumentacionin e mëtejshëm përfshihen edhe të dhëna nga Instituti i Sigurimeve Shoqërore dhe Komisioni i Ndihmës Ekonomike, që e përjashtojnë atë nga puna dhe e kualifikojnë për përfitim ekonomik për periudhën 2005-2006. Në vitet që pasuan, ai ka rezultuar përsëri me të njëjtën diagnozë në proceset e kempit për vitet 2007, 2008, 2009 dhe 2010.
Pas publikimit të dokumenteve, stafi i “Fiks Fare” ka kontaktuar personalisht kandidatin në zyrën e tij në Bashkinë e Vaut të Dejës, ku ai figuron në listën e hapur të Partisë Demokratike. Në një intervistë për emisionin, Gentian Ndoj deklaroi se është kandidat i përzgjedhur nga primaret dhe synon të bëhet deputet. I pyetur për aftësinë e tij për të hartuar ligje, ai u shpreh se është i aftë dhe ka dorëzuar të gjithë dokumentacionin e nevojshëm.
Kur gazetarët e ballafaqojnë me dokumentet e kartelës shëndetësore, ai i cilëson si “akuza të Partisë Socialiste” dhe thotë se gjendja e tij aktualisht është shumë e mirë. Madje, ai thotë se nuk i njeh shkrimet mjekësore, pasi janë me dorë, ndërsa dokumentet me kompjuter i konsideron të pabaza. Ai shton se dosja e tij ndodhet në Bashkinë e Vaut të Dejës, ku më herët ka qenë i punësuar.
I pyetur nëse këto probleme i ka bërë të ditura pranë Partisë Demokratike apo Komisionit Qendror të Zgjedhjeve, Ndoj shmang përgjigjen e drejtpërdrejtë, duke pohuar vetëm se “s’ka asnjë problem shëndetësor”.
Rasti ngre pikëpyetje serioze mbi filtrat e përzgjedhjes së kandidatëve për deputetë dhe transparencën e informacionit shëndetësor të individëve që synojnë të përfaqësojnë qytetarët në Kuvendin e Shqipërisë.
