Një 23-vjeçar nga Franca, Adem Said, është arrestuar nga Policia e Shtetit në kuadër të operacionit “MISLEADING MESSAGES”, të fokusuar kundër krimit kibernetik.
I riu akuzohet se, duke u paraqitur si përfaqësues i një banke të nivelit të dytë, dërgonte qytetarëve në Shqipëri mesazhe me linke mashtruese, përmes të cilave kërkonte të dhënat e tyre bankare.
Pas marrjes së aksesit në llogaritë, ai tërhiqte para nga bankomatet ose përdorte aplikacione bankare për përfitime të paligjshme.
Said u kap në flagrancë pranë një bankomati në Tiranë, në momentin që po tërhiqte para nga një llogari të marrë përmes skemës së mashtrimit.
Gjatë operacionit, policia sekuestroi tre celularë që dyshohet se janë përdorur në aktivitetin kriminal.
Sipas të dhënave të para, numri i qytetarëve shqiptarë të mashtruar arrin në qindra, ndërsa ndaj të riut janë ngritur akuzat për “Mashtrim kompjuterik” dhe “Ndërhyrje në të dhënat kompjuterike”.
Hetimet vazhdojnë për të zbuluar nëse në këtë skemë janë përfshirë edhe persona të tjerë.
Policia apelon qytetarët që të tregohen të kujdesshëm ndaj çdo linku apo kërkese të dyshimtë online dhe të raportojnë menjëherë rastet e ngjashme.
