Kuvendi i Kosovës do të mbajë këtë të premten seancën e gjashtë për konstituimin e legjislaturës së nëntë, që do të zhvillohet në orën 10:00.
Kjo është përpjekja e pestë për të përmbyllur këtë proces pas zgjedhjeve të 9 shkurtit, të cilat kanë dështuar deri tani për të formuar Kuvendin dhe zgjedhur kryetarin e tij të ri.
Në seancën e kaluar, kandidatura e Albulena Haxhiut nga Lëvizja Vetëvendosje nuk mori mjaftueshëm vota. Ajo siguroi vetëm 57 vota nga 61 të nevojshme, ndërsa kundër saj votuan 46 deputetë dhe 3 abstenuan nga Nisma Socialdemokrate.
Ky dështim është përsëritur në tri seanca të tjera, duke treguar se mungon mbështetja nga opozita, përfshirë PDK, LDK dhe AAK. Deputetët nga Lista Serbe nuk morën pjesë në votim.
Lëvizja Vetëvendosje, si fituese e zgjedhjeve, ka të drejtën e nominuarit për kryetar të Kuvendit sipas aktgjykimit të Gjykatës Kushtetuese të vitit 2014, por deri tani nuk ka mundur të sigurojë mbështetje për Albulena Haxhiun.
Pas këtyre dështimeve, shoqëria civile ka kërkuar një takim konsultativ me partitë parlamentare nga presidentja Vjosa Osmani. Megjithatë, kryesuesi i seancës konstituive, Avni Dehari, ka theksuar se nuk është e nevojshme një takim i tillë në seancën e sotme.
