Florenc Doka ka dhënë dorëheqjen nga posti i Drejtorit të Institucionit të Ekzekutimit të Dënimeve Penale në Peqin. Vendimi për dorëheqjen e tij është bërë publik këtë të enjte, ndërsa nuk janë dhënë detaje mbi arsyet që kanë çuar në këtë veprim.
Sipas informacionit të siguruar, Doka ka dorëzuar kërkesën e tij për dorëheqje, e cila është pranuar dhe miratuar nga Ministri i Drejtësisë, Ulsi Maja.
Dorëheqja e tij vjen pas një periudhe kur IEVP Peqin ka qenë në qendër të vëmendjes për çështje të administratës dhe funksionimit të burgjeve në Shqipëri, megjithatë nuk ka indikacione që lidhin këtë vendim me ndonjë ngjarje specifike.
Florenc Doka kishte një eksperiencë të gjatë në sistemin penitenciar, duke kontribuar në implementimin e masave reformuese në institucionin që drejtonte.
Florenc Doka ishte emëruar drejtor i burgut të sigurisë së lartë në Peqin më 22 dhjetor 2023. Karriera e tij në administratën publike ka nisur në vitin 2001, ku ka mbajtur pozita të ndryshme si jurist, Drejtor Juridik dhe zv/kryetar i Bashkisë Cërrik.
Në vitet 2012-2014, ai ka punuar si përgjegjës i sektorit ligjor dhe çështjeve sociale në IEVP Elbasan dhe më pas ka mbajtur postin e Sekretarit të Përgjithshëm në Bashkinë Cërrik.
