Pas tërmetit të fuqishëm që goditi Stambollin, ekspertët paralajmërojnë mundësinë e tronditjeve të tjera.
“Aktualisht ekzistojnë dy mundësi: ose zona e prekur nga tërmeti është stabilizuar për momentin dhe situata sizmike po qetësohet, ose tensionet sizmike të krijuara do të rrisin mundësinë e një tërmeti më të madh në të ardhmen,” shpjegoi Marco Bohnhoff, ekspert pranë Qendrës Helmholtz për Gjeodezinë. Ai theksoi se po monitorohet me vëmendje zhvillimi i mëtejshëm i aktiviteteve sizmike në rajon.
Ky tërmet është regjistruar si më i forti në rajon që nga tërmeti i fundit para 25 vjetësh. Sipas GFZ-së, tërmeti i parë kishte një magnitudë prej 6.2 ballë dhe ndodhi në një thellësi rreth 10 kilometra, rreth 60 kilometra në perëndim të Stambollit, në Detin Marmara. Rreth 13 minuta më vonë, një tjetër tronditje me magnitudë 5.3 ballë goditi rajonin, duke u ndjerë edhe në Greqi dhe Bullgari.
Ekspertët thonë se kjo dridhje e dytë tregon se tensionet sizmike janë zhvendosur, duke rritur mundësinë e pasgoditjeve të tjera. Ministria e Brendshme turke raportoi për më shumë se 120 pasgoditje sizmike.
Rajoni rreth Detit Marmara është një nga zonat më të rrezikshme gjeologjikisht, pasi aty ndodhet një kufi midis dy pllakave tektonike: pllaka euroaziatike dhe pllaka e Anadollit. Në këtë zonë nën Detin Marmara, që ndodhet në jug të Stambollit, nuk ka pasur një tërmet të fortë për më shumë se 250 vjet, duke e bërë atë një pikë shumë të rrezikshme. Ekspertët kanë parashikuar prej kohësh se një tërmet me magnitudë 7 ballë mund të godasë Stambollin në të ardhmen. /DW
