Seanca e parë gjyqësore për padinë për shpifje të ngritur nga Adriatik Lapaj ndaj Agron Shehajt është shtyrë për shkak të mungesës së Shehajt në sallën e gjyqit.
Gjykata ka deklaruar se Shehaj nuk ishte njoftuar zyrtarisht për seancën, ndërsa Lapaj ishte i pranishëm.
Padia e Lapajt ndaj Shehajt ka pasuar pas akuzave të bëra nga ky i fundit, i cili e akuzoi Lapajn se kishte marrë 45 milionë lekë nga kompania “Merkaj 3 shpk”, e cila është nën sekuestro nga SPAK, nën dyshimet për pastrim parash nga grupi kriminal “Çopja”.
Lapaj ka mohuar këto akuza, duke sqaruar se pagesat që ka marrë lidhen me shërbime ligjore të ofruara për këtë kompani.
Pavarësisht këtyre sqarimeve, Shehaj ka vijuar me akuzat, duke publikuar dokumente që, sipas tij, provojnë përfshirjen e Lapajt në regjistrimin e një prone me vlerë milionëshe në zonën bregdetare, të blerë nga e njëjta kompani.
Shehaj pretendon se vendimi për regjistrimin e pronës është marrë nga Alltun Çela, vjehrri i Lapajt, në kohën kur ai drejtonte Gjykatën e Sarandës.
