Djali i Baton Haxhiut, spiunit të dyshuar të UDB-së, Andi Haxhiu, është bërë pjesë e një liste të posaçme që financohet nga shteti për “ekspertë dhe bashkëpunëtorë të specializuar”, por që në praktikë përfshin emra me akses të drejtpërdrejtë në informacione të klasifikuara dhe fonde sekrete.
Haxhiu paguhet rregullisht nga Shërbimi Informativ i Shtetit me një shumë mujore prej 6,000 eurosh, sipas një informacioni të siguruar nga brenda strukturave financiare të SHISH-it.
Emërimi i tij është bërë nga Vlora Hyseni, aktualisht drejtoreshë e SHISH, e njohur më parë për rolin e saj si udhëheqëse e AKI-së në Kosovë gjatë kohës së Presidentit Thaçi dhe e shkarkuar nga institucionet kosovare pas ardhjes në pushtet të Albin Kurtit dhe Vjosa Osmanit.
Haxhiu ka rol të ndjeshëm si kordinator për sigurinë në raport me rrjetin diplomatik shqiptar dhe bashkëpunimin me NATO-n.
Në rastin më të mirë, pagesa e tij mund të përkufizohet si favor financiar dhe shpërdorim i fondeve publike, ndërsa në skenarin më shqetësues, pranisë së tij në zemër të SHISH-it i shtohet rreziku real për sigurinë kombëtare, për shkak të lidhjeve të përfolura të të atit me shërbimet sekrete serbe dhe pozicioneve të dyshimta në të kaluarën.
Në vitin 2017, ai është përmendur si këshilltar pranë Ministrit rus të Mbrojtjes, Sergey Shoigu, i cili aktualisht kryeson Këshillin e Sigurisë së Federatës Ruse.
Baton Haxhiu, përveçse i njohur për marrëdhëniet e tij të ngushta me strukturat serbe, është konsideruar edhe si një nga këshilltarët më të afërt të Kryeministrit Edi Rama. Kjo e bën përfshirjen e të birit në SHISH jo vetëm të papranueshme, por edhe një rast që kërkon reagim të menjëhershëm nga SPAK dhe strukturat e tjera të drejtësisë.
