Përsëritet sërish kaosi në pikat kufitare me Greqinë, teksa emigrantët shqiptarë që festuan Pashkët në atdhe janë përballur me radhë të gjata dhe pritje për t’u rikthyer në vendin fqinj.
Qytetarët shprehen të revoltuar, duke theksuar se kanë më shumë se dy orë që presin për të kaluar kufirin. Sipas tyre, situata është e papranueshme dhe përsëritet çdo vit gjatë festave.
“Çdo festë e njëjta gjë. Presim me orë, me fëmijë të vegjël në makinë. Është e pafalshme që shteti nuk merr masa për të lehtësuar këtë situatë,” tha një emigrant i zemëruar, duke kërkuar që autoritetet përgjegjëse të ndërhyjnë sa më parë për të shmangur përkeqësimin e situatës.
Radhët e gjata dhe vonesat në kalimin e kufirit janë kthyer në një problem të zakonshëm gjatë periudhave festive, duke shkaktuar stres dhe lodhje për qindra familje që lëvizin në të dy anët e kufirit. Emigrantët kërkojnë një zgjidhje të qëndrueshme dhe organizim më të mirë nga strukturat përkatëse për të shmangur përsëritjen e kësaj skene në të ardhmen.
