Administrata e Donald Trump po përgatit një tjetër raund bisedimesh mes të dërguarit të posaçëm Steve Witkoff dhe zyrtarëve të lartë rusë, me qëllimin për t’i bindur ata të pranojnë vizionin amerikan për paqen në Ukrainë raportoi CNN, duke cituar burime anonime.
Witkoff është takuar tashmë tre herë këtë vit me presidentin rus Vladimir Putin.
Sipas tij, bisedimet e fundit në Moskë, që zgjatën rreth pesë orë, ishin “bindëse”, ndërsa Kremlini është i interesuar për një zgjidhje të përhershme të konfliktit.
Sipas CNN, një plan paqeje amerikan është paraqitur tashmë para zyrtarëve ukrainas dhe liderëve evropianë në një takim të nivelit të lartë në Paris.
Plani synon një armëpushim përgjatë vijës aktuale të frontit dhe përfshin gatishmërinë e SHBA-së për të njohur Krimenë si pjesë të territorit rus.
Burimet bëjnë me dije se çdo marrëveshje e mundshme do të përfshinte gjithashtu njohjen e rajoneve Donetsk, Lugansk, Kherson dhe Zaporozhye si pjesë të Federatës Ruse.
Ndërkohë, zëdhënësi i Kremlinit, Dmitry Peskov, deklaroi për gazetarët se ende nuk ekziston një draft konkret i marrëveshjes, por vlerësoi kontaktet me Uashingtonin si “konstruktive dhe të vlefshme”.
