Gjykata e Posaçme ka pranuar kërkesën e grupit “Flakë në det” për t’u gjykuar me procedurën e gjykimit të shkurtuar.
Trupa gjyqësore ka miratuar kërkesën dhe më 23 prill prokuroria do të lexojë konkluzionet përfundimtare për 12 anëtarët e këtij grupi.
Pjesëmarrësit në këtë grup janë: Arlind Ismail Ukaj, Gezim Çela, Nerim Çela, Armando Mema, Dritan Metaj, Besnik Brokeri, Alket Deda, Selami Lushkaj, Ksenofon Bodo, Armando Papa, dhe dy shtetas ukrainas, Kyrylo Ponomarenko dhe Kostiantyn Biellon.
Ata kanë qëndruar në kërkesën për gjykim të shkurtuar gjatë seancës të mërkurën.
Operacioni “Flakë në det” u realizua nga Prokuroria e Posaçme Antikorrupsion në gusht 2023, ku të arrestuarit dyshohen për trafikim lëndësh narkotike në det.
SPAK dhe policia kishin informacion për një shkëmbim të mundshëm droge në det të hapur në zonën e Patokut, përmes përdorimit të gomoneve, të cilat shërbyen për të shkëmbyer hashash me kokainë. Droga u soll nga dy shtetas ukrainas.
