Më 13 mars, gjyqtari Engert Pëllumbi vendosi të lërë në fuqi masën e sigurisë “arrest me burg” për kryebashkiakun e Tiranës, Erion Veliaj.
Sipas vendimit të Gjykatës së Posaçme, në dosje përfshihen detaje të reja që hedhin dritë mbi rolin e Veliajt, bashkëshortes së tij, Ajola Xoxa, dhe Eman Bules.
Sipas arsyetimit të gjykatës, ata dyshohet se kanë vepruar në bashkëpunim, duke krijuar një formë të organizuar kriminale me synim përfitimin material.
Gjykata thekson se bashkëveprimi mes tyre mbart elementët e një grupi të strukturuar kriminal, siç përshkruhet në nenin 28/4 të Kodit Penal, për shkak të përfshirjes së tre personave, qëllimit të përfitimit përmes pastrimit të pasurive të përfituara nga korrupsioni, dhe përsëritjes së veprimtarisë për një periudhë të gjatë.
Megjithatë, në këtë fazë të hetimeve, gjykata nënvizon se kjo formë bashkëpunimi nuk është zyrtarisht e atribuar ndaj të hetuarve dhe, për pasojë, nuk do të merret ende në konsideratë në vendimmarrje.
