GJKKO ka shpallur vendimin ndaj ish-gjyqtares Zamira Vyshka dhe avokatit Ilir Pashaj, të arrestuar në vitin 2022 për korrupsion.
Sipas vendimit të Gjykatës së Posaçme të Apelit për Korrupsionin dhe Krimin e Organizuar, Zamira Vyshka është dënuar me dy vjet burg, por dënimi i saj do të pezullohet dhe do të konvertohet në shërbim prove për të njëjtën periudhë.
Ajo gjithashtu nuk do të mund të ushtrojë funksione publike për pesë vitet e ardhshme.
Ndërkohë, avokatit Ilir Pashaj, i cili akuzohej për korrupsion aktiv në bashkëpunim, iu zbrit dënimi përfundimtar në 1 vit e 4 muaj burg, dhe gjykata urdhëroi lirimin e menjëhershëm të tij, duke konstatuar shuarjen e masës së sigurisë “arrest në burg”.
Të dy të pandehurit u arrestuan në korrik të vitit 2022 me urdhër të SPAK, pasi gjyqtarja Vyshka u kap në flagrancë duke marrë 400 mijë lekë ryshfet nga Pashaj.
Paratë ishin ofruar në këmbim të një vendimi më të lehtë penal për të dënuarin Xhuliano Musai, i akuzuar për plagosje, me qëllim uljen e dënimit të tij me gjashtë muaj.
Në të njëjtin vendim, GJKKO ka shpallur fajtor edhe dy persona të tjerë të përfshirë në këtë çështje, për korrupsion aktiv dhe moskallëzim të krimit, duke dhënë dënime që shkojnë deri në 6 muaj burg pas zbritjes nga gjykimi i shkurtuar.
Gjykata la në fuqi vendimin e mëparshëm të Shkallës së Parë dhe i ngarkoi të pandehurit me shpenzimet procedurale në mënyrë solidare. Sipas legjislacionit, vendimi mund të apelohet brenda 15 ditëve nga dita e shpalljes.
