Drejtori i AKU-së në Tiranë, Fatjon Pasholli, është shkarkuar nga detyra pas skandalit të mishit me salmonelë dhe pesticide.
Ky veprim vjen disa ditë pas daljes në treg të 8 tonëve mish pule të infektuar me salmonelë. Në vend të tij, është komanduar Alketa Hoxha.
Prokuroria e Tiranës ka nisur hetimet për dy vepra penale shpërdorim detyre për tre inspektorë të AKU-së, të cilët lejuan daljen në treg të filetove të kontaminuara, si dhe për importimin e ushqimeve të rrezikshme për shëndetin.
Për këtë arsye, policia ka shpallur në kërkim Arben Goxhën, pronarin e kompanisë “AMG Food”, e cila solli nga Brazili 27 tonë mish pule të papërpunuar, të ndarë në katër lote.
Një kontroll rastësor i AKU-së në një nga këto lote, më 11 mars, zbuloi praninë e salmonelës në 8 ton mish. Përgjigja nga laboratori i ISUV për këtë mostër mbërriti më 21 mars, ndërsa informacioni u publikua më vonë se është konfirmuar pranija e salmonelës.
AKU nuk ka publikuar ende emrin e kompanisë importuese dhe nuk ka bërë të ditur cilat biznese kanë blerë mishin e kontaminuar.
Pjesa më e madhe e mishit, gati 5 tonë, është bllokuar, dhe vijojnë kontrollet për të tërhequr produktin nga tregu, duke përfshirë Fast Food-et, restorantet dhe marketet në 10 qarqe të vendit, përveç Beratit dhe Lezhës.
Ndërkohë, Olsi Komici vazhdon të qëndrojë në postin e drejtorit të përgjithshëm të AKU-së.
