Policia e Beratit ka arrestuar dy shtetas 40-vjeçarë, si pjesë e kontrolleve të intensifikuara për goditjen e krimeve dhe kapjen e personave në kërkim.
Në një nga rastet, specialistët për Hetimin e Narkotikëve ndaluan shtetasin S. D., 40 vjeç, pasi gjatë kontrollit fizik iu gjet një sasi lënde narkotike e dyshuar si Cannabis Sativa, e ndarë në doza dhe e gatshme për shitje.
Gjatë operacionit, atij iu sekuestruan gjithashtu një armë gjahu, një thikë dhe municion luftarak, të cilat u morën si prova materiale.
Ndërkohë, në një operacion tjetër, Policia e Kuçovës ndaloi shtetasin K. O., 40 vjeç, banues në Kamzë, i shpallur më parë në kërkim.
Ai ishte dënuar me masën e sigurisë “arrest në burg” nga Gjykata e Shkallës së Parë e Juridiksionit të Përgjithshëm Berat, për veprën penale të “vjedhjes”. K. O. dyshohet se në vitin 2021 ka vjedhur një automjet në qytetin e Kuçovës.
Të dy çështjet i janë referuar Prokurorisë së Beratit për hetime të mëtejshme.
