Sot mbahen homazhet në nder të ikonës së teatrit dhe kinematografisë shqiptare, Margarita Xhepa, e cila u nda nga jeta një ditë më parë, në moshën 91-vjeçare.
Ministria e Ekonomisë, Kulturës dhe Inovacionit njoftoi se ceremonia do të zhvillohet në hollin e Teatrit Kombëtar të Operas dhe Baletit, nga ora 10:00 deri në 13:00, pas dakordësisë me familjarët e aktores së ndjerë.
Margarita Xhepa mbetet një nga figurat më të shquara të artit shqiptar, me një karrierë që përfshin më shumë se 180 role në teatër dhe kinematografi. Aktiviteti i saj artistik nisi në vitet ’50 në Teatrin Popullor, ndërkohë që vijonte studimet në Liceun Artistik për Dramë.
Në skenën shqiptare, ajo ka interpretuar në një sërë rolesh të paharrueshme, si Majlinda në “Majlinda”, Dafina në “Lumi i vdekur”, apo Zonja Mëmë në “Kush e solli Doruntinën”. Po ashtu, ka shkëlqyer edhe në veprat e dramaturgjisë botërore, në role si Ofelia në “Hamleti”, Dado në “Romeo e Xhulieta” dhe Mbretëresha Margaret në “Rikardi III”.
Përveç teatrit, Xhepa ka lënë gjurmë edhe në kinematografi me 32 role të spikatura në filma si “Dimri i fundit”, “Gjurmët”, “Apasionata”, “Gjenerali i ushtrisë së vdekur”, “Dora e ngrohtë”, “Koncert në vitin 1936” e shumë të tjerë. Në vitin 1997, ajo u vlerësua ndërkombëtarisht me Çmimin e Nderit për rolin në filmin grek “Mirupafshim”, fitues i Çmimit të Madh në Festivalin Ndërkombëtar të Filmit Mesdhetar në Selanik.
Aktorja e madhe do të kujtohet gjithmonë për kontributin e jashtëzakonshëm që i ka dhënë artit dhe kulturës shqiptare.
