Policia e Tiranës ka ndaluar Arben Goxhën, pronarin e kompanisë “AMG Food”, i cili më 11 mars importoi nga Brazili mish pule të kontaminuar me salmonelë.
Një pjesë prej 8 tonësh të cilët kanë përfunduar në treg duke rrezikuar shëndetin e konsumatorëve
Pavarësisht ndalimit, sasia e plotë ende nuk është tërhequr nga tregu.
Sipas njoftimit zyrtar, “Specialistët e Seksionit për Hetimin e Krimit Ekonomik dhe Financiar ndaluan shtetasin Arben Goxha, 50 vjeç, i shpallur më herët në kërkim për veprën penale ‘Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve’.
Pas konsultës me prokurorin, u vendos që ai të procedohet në gjendje të lirë.”
Ngarkesa ishte futur në vend nëpërmjet Portit të Durrësit, ndërsa më 21 mars analizat e Institutit të Sigurisë Ushqimore dhe Veterinare konfirmuan praninë e salmonelës në mish.
Ndërkohë që AKU kishte kërkuar nga “AMG Food” ta mbante produktin në ruajtje frigoriferike deri në përfundimin e analizave, kompania e shpërndau produktin në treg, duke shkelur ligjin.
Deri më tani, AKU ka arritur të bllokojë vetëm 4 ton nga ngarkesa prej 8 tonësh.
