Një krim makabër ka tronditur Italinë, ku 22-vjeçarja shqiptare Ilaria Sula u gjet e vrarë dhe e futur në një valixhe, e cila ishte hedhur në një zonë të pyllëzuar në Poli.
Autoritetet dyshojnë se pas kësaj ngjarjeje të rëndë qëndron ish-i dashuri i saj, 23-vjeçari Marc Samson, i cili ka pranuar vrasjen dhe ka rrëfyer se telefonin e saj e hodhi në një pusetë.
Samson, student arkitekture dhe punonjës në një fast food, është arrestuar nën akuzën e vrasjes dhe fshehjes së trupit.
Hetuesit arritën ta gjurmojnë atë përmes tabulateve telefonike, pasi besohet se pas zhdukjes së Ilaria-s, ai ka përdorur celularin e saj për të postuar në rrjetet sociale.
Vëllai i viktimës, Leoni Sula, tregoi se e kishte takuar për herë të fundit më 23 mars, kur ajo e kishte vizituar në Terni.
“Ishte e qetë dhe nuk më tregoi për ndonjë problem. Pas asaj dite, mora disa mesazhe prej saj, por nuk jam i sigurt nëse i ka shkruar ajo,” – u shpreh ai.
Sipas tij, Ilaria dhe Marc kishin qenë në një lidhje për rreth një vit, por ishin ndarë.
“Pyesim veten pse e bëri këtë. Vetëm ai e di arsyen,” – përfundoi ai.
