Në “Koha për t’u zgjuar” këtë mëngjes, mjeku veteriner Rushan Vrapi diskutoi mbi kontaminimin e ushqimit, një temë shumë e diskutuar pas sekuestrimit të një sasie të konsiderueshme mishi me salmonelë.
Ai theksoi rëndësinë e respektimit të kushteve higjeno-sanitare, veçanërisht në thertore, dhe rëndësinë e zinxhirit të ftohjes.
Vrapi shpjegoi se zinxhiri i ftohjes është jetik për sigurinë e mishit, pasi pas therjes së kafshës, mishi duhet të mbahet për 48 orë në temperatura nën 0 gradë Celsius (zakonisht -4°C).
Kjo ndihmon në uljen e ngarkesës mikrobike, edhe pse jo 100%. Ai shtoi se kjo ka ndikim të drejtpërdrejtë në reagimin e trupit tonë ndaj konsumit të mishit të kontaminuar.
Mjeku gjithashtu ndau disa indikatorë për të njohur mishin e kontaminuar. Një mish i freskët duhet të ketë ngjyrë të kuqe ose rozë, dhe nuk duhet të ketë aroma të pakëndshme apo lëngje me ngjyrë të ndryshme. Sa i përket strukturës, mishi nuk duhet të jetë as xhelatinoz, as i fortë.
Vrapi theksoi gjithashtu rrezikun e përdorimit të antibiotikëve në kafshë, pasi ato nuk shkatërrohen gjatë gatimit, madje as në temperatura të larta, si 100°C.
Sipas tij, përdorimi i tepërt i antibiotikëve është një nga problemet më të mëdha të shëndetit global, pasi krijohet rezistencë ndaj tyre.
