Një zyrtar policor është vrarë me armë zjarri mbrëmjen e së martës në hyrje të banesës së tij në Kaçanik, Kosovë.
Policia ka konfirmuar ngjarjen, duke bërë të ditur se efektivi nuk ka mundur t’u mbijetojë plagëve të marra.
Sipas autoriteteve, ngjarja ka ndodhur në rrugën “Idriz Seferi”, ku pas marrjes së informacionit, njësitë policore dhe ekipi i emergjencës kanë mbërritur menjëherë në vendngjarje.
Viktima u transportua në Qendrën e Mjekësisë në Kaçanik, ku mjekët konstatuan vdekjen e tij.
Mediat vendase raportojnë se viktima është efektivi Muhamet Lika, ndërsa rrethanat e plota të ngjarjes dhe identiteti i autorëve mbeten ende të paqarta. Hetimet po vijojnë për zbardhjen e krimit.
