Një 36-vjeçar është plagosur me thikë në Pogradec pas një konflikti për motive të dobëta.
Policia ka arrestuar autorin e dyshuar, 54-vjeçarin L. O., ndërsa ka proceduar në gjendje të lirë 38-vjeçarin A. B., i cili dyshohet se ndihmoi atë të largohej nga vendngjarja.
Ngjarja ndodhi rreth orës 20:20 në lagjen nr. 3 të qytetit. Menjëherë pas njoftimit, forcat e rendit organizuan operacionin për kapjen e autorit.
Pas hetimeve, u zbulua se L. O. ishte larguar me një automjet tip “Benz”, i ndihmuar nga A. B. Pas disa orësh kërkimesh, policia e lokalizoi dhe e arrestoi.
L. O. akuzohet për “Plagosje të rëndë me dashje” dhe “Mbajtje pa leje të armëve të ftohta”, ndërsa A. B. për “Përkrahje të autorit të krimit”.
Policia ka sekuestruar armën e ftohtë dhe automjetin e përdorur për largimin nga vendngjarja. I plagosuri ndodhet jashtë rrezikut për jetën, ndërsa materialet hetimore i kaluan Prokurorisë së Korçës për veprime të mëtejshme.
