Një 25-vjeçar është arrestuar sot në Tiranë, pasi është identifikuar si autori i katër vjedhjeve. Sipas policisë, i riu ka kryer këto vjedhje brenda një periudhe 10-ditore, duke vjedhur në dy markete të kryeqytetit.
Autoritetet bëjnë me dije se ai ka pasur një të kaluar të mëparshme penale për vjedhje.
Hetimet janë në vazhdim për të zbardhur nëse i arrestuari ka kryer vjedhje të tjera. Materialet e procedurës janë dërguar në Prokurorinë e Tiranës për veprime të mëtejshme.
Njoftimi i plotë:
DVP Tiranë/ Gjatë 10 ditëve të fundit, kreu 4 vjedhje në 2 supermarkete, identifikohet, kapet dhe vihet në pranga 25-vjeçari.
Ky shtetas, i dënuar më parë, për të njëjtin krim. Si rezultat i hetimeve dhe veprimeve të tjera operacionale, të kryera nga shërbimet e Komisariatit të Policisë Nr. 3, menjëherë pas 4 denoncimeve të 10 ditëve të fundit, për vjedhje të produkteve ushqimore dhe pijeve alkoolike, në supermarkete, u identifikua, u kap dhe u vu në pranga, autori i dyshuar i rasteve, shtetasi:
-A. C., 25 vjeç, banues në Elbasan. Vijojnë hetimet për dokumentimin e vjedhjeve të tjera që mund të ketë kryer ky shtetas. Materialet procedurale iu referuan Prokurorisë së Tiranës, për veprime të mëtejshme.
