Safet Bajri u arrestua ditën e sotme me urdhër të SPAK, ndërsa masa sigurie është caktuar edhe për Asmer Bilalin dhe Behar Bajrin.
Operacioni “Oazi” dhe arrestimi Bajrit në 2018, çfarë dënimi mori?
Në vitin 2018, Safet Bajri u arrestua gjatë operacionit “Oazi”, i cili çoi në ndalimin e 11 anëtarëve të grupit kriminal “Bajri” në Shkodër. Ky grup akuzohej për një sërë veprash të rënda penale, përfshirë prostitucion, trukime ndeshjesh, vrasje, gjobëvënie, trafik droge dhe pastrim parash.
Safet Bajri ishte dënuar nga drejtësia belge me 9 vite burg, nga të cilat ai kreu 3 vite në Bruksel dhe pjesën e mbetur në burgun e Reçit, pasi ekstradimi i tij drejt Belgjikës nuk u realizua për shkak të mungesës së një marrëveshjeje mes dy vendeve.
Ndërsa, në dhjetor të vitit 2020, Gjykata e Shkodrës dha vendimet për 5 nga anëtarët e grupit “Bajri”. Megjithëse operacioni i shumëtrumbetuar i Policisë së Shtetit synonte të godiste një nga grupet më të fuqishme kriminale në vend, procesi gjyqësor solli rrëzimin e akuzës për “grup të strukturuar kriminal”.
Për më tepër, avokatët e të pandehurve, Arbër Hoxha dhe Sokol Tahiraj, kërkuan gjykim të shkurtuar, çka u dha të arrestuarve përfitimin e uljes me 1/3 të dënimit.
Vendimet e Gjykatës për anëtarët e grupit “Bajri”
1. Safet Bajri – 2 vite e 6 muaj burg
2. Ilir Bajri – 1 vit e 8 muaj burg për armëmbajtje pa leje
3. Asmer Bilali – 3 vite burg
4. Ismet Idrizi – 2 vite e 6 muaj burg për armëmbajtje pa leje
5. Emrah Plaku – 2 vite burg për armëmbajtje pa leje
