Ish-kandidati i opozitës për Bashkinë e Himarës, Petro Gjikuria, ka depozituar një padi në SPAK kundër kryebashkiakut Vangjel Tavo dhe të riut socialist Dasho Veizaj.
Veizaj, i njohur edhe si “Petalja më e bukur e trëndafilit socialist” pas një fjalimi në një konventë rinore të PS-së, akuzohet nga Gjikuria për zhvendosje të paligjshme si votues në Himarë.
Sipas tij, qindra persona janë regjistruar në mënyrë të paligjshme për të ndikuar në rezultatin zgjedhor në favor të Tavos, përfshirë edhe familjarët e tij.
Në padinë e dorëzuar përmendet edhe emri i Dritan Shakohoxhës, ndërsa Gjikuria ka akuzuar një sërë ministrash për përfshirje të paligjshme në fushatën elektorale.
Ai ka kërkuar gjithashtu informacion nga SPAK mbi ecurinë e padive të mëparshme të depozituara prej tij.
Opozita ka kritikuar SPAK-un, duke e akuzuar për mospërndjekje të krimeve elektorale dhe për neglizhencë ndaj rasteve ku përfshihen zyrtarë të lartë të mazhorancës.
