Prokuroria Speciale e Kosovës ka dërguar kërkesë në Gjykatën Themelore të Prishtinës për të urdhëruar paraqitjen e Kryeministrit Albin Kurti si dëshmitar në rastin e keqpërdorimit të rezervave shtetërore.
Kërkesa është dërguar javën e kaluar dhe, sipas Departamentit Special të Gjykatës Themelore, është në proces shqyrtimi.
Albin Kurti ishte thirrur si dëshmitar në dhjetor 2024 për të dhënë dëshminë e tij lidhur me këtë rast, por ai nuk u paraqit, pasi ndodhej jashtë vendit.
Ai kishte sugjeruar mundësinë e dëshmisë nga zyra e tij në kryeministri, por kjo kërkesë u refuzua nga kryeprokurori i Prokurorisë Speciale, Blerim Isufaj.
Kurti e cilësoi këtë si një skenar të orkestruar, ku ai shfaqej duke hyrë në Prokurorinë Speciale për intervistim.
“Unë guxoj t’ju them s’po vij. Ta shohim tash a guxojnë ata të vijnë”, tha Kurti
Nëse Kurti refuzon të dëshmojë përsëri, ai mund të përballet me një gjobë deri në 250 euro.
Në rast të një refuzimi të dytë, mund të lëshohet një ftesë tjetër, dhe nëse ai vazhdon të refuzojë, mund të vendoset në paraburgim.
