Të martën, Hamasi bëri të ditur se të shtunën do të lirojë gjashtë pengje izraelite, dyfishin e numrit fillestar të planifikuar.
Gjithashtu, grupi militant njoftoi se të enjten do të dorëzojë trupat e pajetë të katër pengjeve të tjerë, një lëvizje e papritur që duket se vjen si përgjigje ndaj vendimit të Izraelit për të lejuar hyrjen e shtëpive portative dhe pajisjeve të ndërtimit në Gazën e shkatërruar.
Në këmbim, Izraeli pritet të lirojë qindra të burgosur palestinezë, përfshirë ata që po vuajnë dënime të përjetshme për sulme të dhunshme.
Pavarësisht kësaj lëvizjeje, të dyja palët ende duhet të negociojnë kushtet për fazën e dytë dhe më të ndërlikuar të armëpushimit.
Forumi i Familjeve të Pengjeve dhe të Pagjeturve ka konfirmuar identitetin e gjashtë izraelitëve që do të lirohen, Eliya Cohen, Tal Shoham, Omer Shem Tov, Omer Wenkert, Hisham Al-Sayed dhe Avera Mengistu
• Eliya Cohen, 27 vjeç, u rrëmbye më 7 tetor 2023 nga një vendstrehim afër festivalit të muzikës Nova në jug të Izraelit.
• Tal Shoham, 40 vjeç, u rrëmbye nga vendbanimi Beeri, një komunitet fermerësh që u godit rëndë gjatë sulmit të Hamasit. Familja e tij, përfshirë gruan, dy fëmijët dhe tre kushërinjtë, u rrëmbyen gjithashtu, por më vonë u liruan.
• Omer Shem Tov, 22 vjeç, dhe Omer Wenkert, 23 vjeç, u rrëmbyen gjithashtu në festivalin Nova. Familja e Wenkert kishte shprehur shqetësim të madh për shëndetin e tij, pasi ai kishte nevojë për ilaçe për një sëmundje të organeve tretëse.
• Hisham Al-Sayed, 36 vjeç, dhe Avera Mengistu, 39 vjeç, ndryshe nga të tjerët, ishin mbajtur në Gazë shumë kohë para konfliktit të 7 tetorit. Al-Sayed, një arab beduin nga Izraeli, kishte kaluar vetë në Gazë në vitin 2015, ndërsa Mengistu, me prejardhje nga Etiopia, kishte hyrë në këtë territor në vitin 2014.
Të martën, ushtria izraelite u tërhoq nga fshatrat kufitare në jug të Libanit, në përputhje me marrëveshjen e ndërmjetësuar nga SHBA, e cila i dha fund luftës mes Izraelit dhe Hezbollahut.
Pas tërheqjes, trupat libaneze u vendosën në zonat e lëna nga Izraeli, duke filluar pastrimin e postblloqeve dhe kërkimin për eksplozivë të pashpërthyer.
Megjithatë, Izraeli vazhdon të mbajë kontrollin në pesë pika strategjike përgjatë kufirit, një çështje që mbetet objekt debati mes autoriteteve libaneze dhe Hezbollahut, të cilët kërkojnë një tërheqje të plotë.
Ndërkohë, banorët libanezë që po kthehen në fshatrat e tyre kufitare janë të shokuar nga niveli i dëmeve të shkaktuara.
Takimi i planifikuar më 27 shkurt mes shteteve arabe për të diskutuar situatën në Gazë është shtyrë për më 4 mars për arsye logjistike, sipas Ministrisë së Jashtme të Egjiptit.
Ky takim ka për qëllim të ofrojë një kundër-propozim ndaj planit të Presidentit amerikan Donald Trump për Gazën, i cili është kundërshtuar fuqimisht nga palestinezët dhe shumica e vendeve arabe.
