Një 28-vjeçar në Fier është arrestuar pasi u kap në flagrancë duke shitur kokainë dhe kanabis ndaj pesë personave, mes të cilëve edhe të mitur.
Po ashtu, një 30-vjeçar është vënë në pranga, ndërsa katër shtetas të tjerë, blerës të dozave të lëndëve narkotike, janë nën hetim.
Policia ka njoftuar gjithashtu se gjatë operacionit janë sekuestruar 508 gramë kokainë dhe qindra doza kanabisi, me një vlerë të përgjithshme rreth 90,000 euro.
Njoftimi i Policisë:
Si rezultat i një hetimi me metoda proaktive dhe në bazë të informacioneve të siguruara nga inteligjenca policore, mbi implikimin e një shtetasi në veprimtarinë kriminale të shitjes së lëndëve narkotike, në doza, specialistët e Seksionit për Hetimin e Narkotikëve, në bashkëpunim me specialistët e Seksionit Operacional dhe me Prokurorinë e Fierit, finalizuan operacionin policor të koduar “Price”.
Gjatë operacionit u arrestuan në flagrancë shtetasit E. M., 28 vjeç, dhe R. N., 30 vjeç. Gjithashtu, nisi procedimi në gjendje të lirë për shtetasit K. T., 30 vjeç dhe V. K., 19 vjeç, si dhe për 2 shtetas të moshave 16 dhe 17 vjeç.
28-vjeçari u kap në flagrancë duke i shitur në banesën e tij, doza Kokaine dhe Cannabisi, shtetasit R. N. dhe 4 shtetasve të proceduar, të cilët shoqëronin 30-vjeçarin.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
