Detaje të reja janë zbardhur mbi rastin tragjik të 25-vjeçarit Romario Brunga, i cili u gjet i pajetë brenda automjetit të tij, pasditen e së enjtes.
Policia e Lezhës ka shtuar dyshimet mbi një vetëvrasje të mundshme, pas hetimeve të kryera.
Sipas burimeve, personi i fundit që ka komunikuar me Brungën ka qenë shoku i tij i ngushtë. Në një telefonatë të fundit, 25-vjeçari i kishte thënë: “Kam një hall shumë të madh.”
Pas kësaj, ai ka mbyllur telefonin dhe nuk i është përgjigjur më thirrjeve.
Pamjet nga kamerat e sigurisë tregojnë se Romario ka qenë gjatë gjithë kohës duke folur në telefon, që nga momenti kur ka dalë nga puna, ku punonte si kamarier, deri në vendin ku dyshohet se ka ndodhur ngjarja.
Sipas personave të afërt, Brunga ishte kthyer së fundmi nga Spanja dhe nuk kishte shfaqur shenja depresioni më herët.
Megjithatë, hetimet vazhdojnë për të zbardhur rrethanat e plota të ngjarjes dhe për të kuptuar motivet e mundshme që e çuan 25-vjeçarin drejt këtij akti tragjik.
