Prokuroria për Ndjekjen e Krimit të Organizuar dhe Korrupsionit në Maqedoninë e Veriut ka zbuluar dhe konfiskuar rreth gjysmë milioni euro dhe pajisje për falsifikimin e parave, gjatë një aksioni të koduar “Vardar”.
Aksioni, i realizuar me mbështetje nga EUROPOL dhe Eurojust, ka çuar në arrestimin e dhjetë personave dhe sekuestrimin e një sasie të konsiderueshme monedhash dhe pajisjesh, përfshirë kopje të pjesëve të kartëmonedhave dhe armë.
Në operacionin e realizuar të hënën, autoritetet kanë sekuestruar 500.000 euro, 25.000 dollarë amerikanë, 500 franga zvicerane, 1800 shekela izraelite, 500 kuna kroate, 10.000 lekë, 1.000 krona suedeze dhe 25.000 rubla ruse.
Po ashtu, janë ekzekutuar 23 urdhra për kontroll dhe janë siguruar prova materiale. Aksioni ka qenë një vazhdimësi e operacionit të gushtit të vitit të kaluar, kur u sekuestruan pajisje për falsifikim të monedhave euro dhe materiale të tjera të gatshme për prodhim.
Aksioni ka përfshirë edhe Serbinë, ku janë kryer bastisje në Novi Pazar, Novi Sad, Sombor dhe Suboticë, duke çuar në arrestimin e gjashtë personave dhe sekuestrimin e 180.000 kartëmonedhave të falsifikuara.
