Një shtetase turke është arrestuar në Tiranë, si pjesë e operacionit “Escort”, pasi akuzohet për rekrutimin e vajzave të huaja nga Turqia dhe Azerbajxhani, për t’i shfrytëzuar në prostitucion.
Gjatë operacionit, policia sekuestroi bizhuteri floriri dhe para të dyshuara të fituara nga aktiviteti i paligjshëm.
Po ashtu, janë referuar dy shtetase të tjera turke për ushtrim prostitucioni.
Njoftimi i Policisë:
Specialistët e Seksionit për Hetimin e Trafiqeve të Paligjshme, në vijim të veprimeve hetimore dhe procedurale të kryera në kuadër të operacionit policor të koduar “Escort”, zhvilluar 2 javë më parë, kanë kapur dhe vënë në pranga, në bashkëpunim me Komisariatin e Policisë Rinas, shtetasen G. Ç., 40 vjeçe, banuese në Turqi.
Nga veprimet hetimore dyshohet se shtetasja G. Ç., në bashkëpunim me shtetasen A. H. (e arrestuar), rekrutonin shtetase të huaja, nga Turqia dhe nga Azerbajxhani, dhe më pas i shfrytëzonin për prostitucion, duke përdorur një faqe online.
Gjatë kontrollit fizik, shtetases G. Ç. i janë gjetur bizhuteri floriri dhe rreth 3000 euro, të dyshuara të përfituara nga kjo veprimtari e kundërligjshme.
Materialet procedurale i kaluan Prokurorisë së Tiranës, për veprime të mëtejshme.
