Prokuroria pranë Gjykatës së Shkallës së Parë të Juridiksionit të Përgjithshëm Fier ka dërguar në gjyq çështjen penale nr. 1300, të vitit 2023, për 10 të pandehur, të akuzuar për “Prodhimin dhe shitjen e narkotikëve” në bashkëpunim dhe më shumë se një herë, sipas nenit 283, paragrafi 2, të Kodit Penal.
Të pandehurit janë: A.B., D.D., E.K., G.Ç., G.C., K.B., K.Ç., N.Ll., K.Q., dhe Xh.R.
Çështja u nisi pas një referimi të Drejtorisë Vendore të Policisë Fier, e cila zbuloi përfshirjen e disa shtetasve në shitjen dhe shpërndarjen e lëndëve narkotike në territorin e Bashkisë Fier.
Hetimet proaktive, të kryera në bashkëpunim me Policinë e Fierit, përfshinë përgjime, regjistrime në vende publike, kontroll të banesave, sekuestrime dhe marrje deklaratash, duke vërtetuar se të gjithë të pandehurit kanë shpërndarë lëndë narkotike të llojeve kokainë, heroinë dhe cannabis sativa.
Në vijim të hetimeve, Prokuroria kërkoi nga Gjykata e Fierit masën “arrest në burg” për të gjithë të pandehurit.
