Këshilli i Mandateve dhe Imuniteve shqyrtoi këtë të premte propozimin e Partisë Demokratike për vetëdeklarimin e deputetëve lidhur me përdorimin e aplikacioneve SkyECC dhe EncroChat.
Deputetja e PD-së, Dhurata Çupi, sugjeroi që Kuvendi të kërkojë nga SPAK lista të deputetëve, ministrave dhe zyrtarëve të tjerë të lartë që mund të kenë përdorur këto aplikacione.
Propozimi u mbështet gjithashtu nga deputetja e PS-së, Blerina Gjylameti.
Dhurata Çupi: Kuvendi t’i drejtohet SPAK me një kërkesë. Nga 16 mijë përdorues të na thotë kush janë ish-deputetët, deputetë, ish-ministra, ministra apo funksionarë publikë që kanë përdorur këtë aplikacion.
Blerina Gjylameti: Mbështes propozimin e Çupit, mund t’i drejtohemi SPAK për këto dy aplikacione por për ndryshimin e regullores. Mileti duhet të dijë të vërtetën. Ne nuk po themi të bëjmë organ akuze. Por me integritetin e secilit deputet të thotë nuk e kam përdorur këtë aplikacion.
Ndërkohë, nismëtari i propozimit për vetëdeklarimin e ligjvënësve që kanë qenë përdorues të këtyre aplikacioneve, Gazment Bardhi tha se janë 10-20 deputetë të Kuvendit të Shqipërisë të cilët mendohet se kanë patur në telefonat e tyre SkyEcc dhe EncroChat.
Gazment Bardhi: Keni siklet nga SkyEcc dhe EncroChat. Ke qenë ministër i Brendshëm. E turpshme të mos dish metodat si ka komunikuar krimi. Je shef personeli ti që ruan pastrueset kur hyjnë e kur dalin? Unë s’kam përdorur aplikacion, ça implikimi ligjor kam unë? Nuk po akuzojmë. Ka deputetë që kanë përdorur këtë sistem për të komunikuar me krimin e organizuar, janë 10-20 të mbajnë përgjegjësi, 120 të tjerët s’kanë pse të mbajnë baltën e këtyre individëve. Po i fshihni opinionit publik se kush është ajo pakicë që ka përdorur aplikacionet e krimit të organizuar?
