Ulja e temperaturave ka rikthyer reshjet e dëborës në veri të Shqipërisë. Gjatë natës dhe mëngjesit të sotëm, dëbora ka mbuluar zona si Thethi, Lëpusha, Vermoshi, Dukagjini, si dhe zonat e thella të Pukës dhe Fushë Arrëzit.
Deri më tani, nuk raportohen probleme në qarkullimin rrugor, megjithatë disa fshatra po përballen me mungesë të energjisë elektrike.
Në Qarkun e Kukësit, reshjet e dëborës janë regjistruar në zonat malore, me intensitet të ulët deri në mesatar.
Autoritetet dhe subjektet kontraktore po vijojnë punën për pastrimin dhe kriposjen e rrugëve, për të garantuar qarkullim të sigurt.
Ndërkohë, problemet me furnizimin me energji elektrike janë raportuar në fshatrat Myhejan dhe Kërrnajë në bashkinë Tropojë.
