Drejtuesi politik i Partisë Demokratike për Tiranën, Belind Këlliçi, ka njoftuar se PD do të organizojë një tjetër protestë para Bashkisë së Tiranës, në datën 10 janar, në orën 11:00, për të kundërshtuar kryebashkiakun Erion Veliaj dhe akuzat e korrupsionit që rëndojnë mbi të.
Kjo do të jetë protesta e 41-të e opozitës ndaj Veliajt, pas shpalljes së 4 akuzave nga SPAK-u.
Në një deklaratë, Këlliçi ka theksuar se grupi i organizuar që drejton Veliaj, që sipas tij ka marrë peng Bashkinë dhe buxhetin e saj, duhet të largohet menjëherë. Ai ka kërkuar që SPAK-u të marrë masa të menjëhershme sigurie ndaj kryebashkiakut, për të ndaluar shkatërrimin e provave dhe abuzimin me paratë e qytetarëve të Tiranës. Protesta do të mbahet përpara selisë së Bashkisë dhe inceneratorit të Tiranës, me thirrjen që korrupsioni të ndalet dhe përgjegjësit të vihen para drejtësisë.
