Edmond Çipllaka ndodhet në burg prej disa ditësh, pasi akuzohet për trafik të lëndëve narkotike, fshehje të të ardhurave dhe trafikim të qenieve njerëzore.
Ai u arrestua nga policia e Elbasanit, në fillim të muajit korrik. 43-vjeçari ish-boksier e kishte kthyer lokalin e tij “Tallava Qerosi” në një lokal me muzikë live. Lokali ndodhej pranë Belshit, ku klientëve u ofroheshin edhe shërbime ekstra. Pesë vajza punonin si balerina në lokalin e Çipllakës.
Në këtë lokal shpërndahej lëndë narkotike, ku klientët shoqëroheshin edhe nga vajzat të cilat punonin aty.
Gjatë kontrollit nga policia, në katin e nëndheshëm të këtij ambienti, ishte edhe vetë shtetasi Edmond Çipllaku. Ky i fundit e kishte marrë lokalin me qera.
Në lokal u gjetën dy qese plastike transparente, në të cilat kishte lëndë narkotike kokainë. Gjatë kontrollit të ambientit gjithashtu nuk u konstatua as kasë fiskale.
Në momentin e arrestimit, Çipllakës i është komunikuar edhe se do të akuzohej për shfrytëzim prostitucioni, por kjo akuzë nuk është provuar, ndaj edhe prokuroria nuk e ka ngritur në gjykatë.
Në lokal u gjendën 5 vajza që deklaronin se punonin si balerina.
“Në ambientet e këtij lokali, ndër të tjerë janë konstatuar dhe shoqëruar në ambientet e DVP Elbasan shtetaset: F.H., lindur në Kurbin e banuese në Patos; M.H, lindur në Lezhë e banuese në Patos; S.Y, lindur në Kuçovë e banuese në Patos; K.P, lindur e banuese në Lushnje dhe A.S, lindur në Korçë e banuese në Lushnje. Këto shtetase kanë deklaruar, se punojnë si balerina në lokalin e Edmond Çipllaka, të cilin e thërrasin “Mond Qerosi”, përveç shtetases K.P, e cila ka qenë për herë të parë në këtë lokal”, thuhej në njoftimin e policisë.
