Një statistikë tronditëse ka dëshmuar transformimin e plotë të policisë shqiptare: 444 policë nën hetim në vitin 2024, 163 të arrestuar: 60% më shumë se një vit më parë. Por këto shifra janë vetëm një pjesë e vogël e një sistemi ku uniforma blu është kthyer në pasaportë pasurimi.
Brenda mureve të komisariateve, ku dikur qytetarët trokisnin për mbrojtje, sot lulëzon një biznes miliardash. Një inspektor policie fiton më shumë se një sipërmarrës i ndershëm – jo nga paga e shtetit, por nga “bizneset” që mbikëqyr: hashashi që udhëton lirisht nga veriu në jug, kokaina që kalon doganat si ujë në kënetë, bastet që gjenerojnë miliona çdo ditë e Forex para të cilit mbyllin sytë.
Shkodra është bërë vitrina e kësaj tradhtie. Në vetëm 20 ditë, qyteti u trondit nga 7 ngjarje të rënda kriminale. Dy makina me tre burra të armatosur me automatikë patrullonin rrugët sikur të ishin në oborrin e shtëpisë së tyre. Policia? E zënë duke ruajtur “territoret” që u ka caktuar krimi i organizuar.
Në Vlorë, tragjedia bëhet groteske. Ndërsa peshkatarët shqiptarë luftonin me valët për jetën e tyre, policia kufitare priste “shpëtimin” nga Italia – ndoshta sepse ishin të zënë duke mbikëqyrur ndonjë ngarkesë tjetër më fitimprurëse në det të hapur.
Cinizmi i sistemit arrin kulmin në urdhrat që marrin policët e thjeshtë: “Kapni ndonjë hajdut pulash”. Ndërkohë, baronët e vërtetë të krimit pinë kafe me drejtuesit e policisë, duke planifikuar “operacionet” e radhës. Një gjobë parkimi ndiqet me më shumë zell se një transport kokaine – e para për statistika, e dyta për xhepa.
Por asgjë nuk e dëshmon më mirë degradimin e policisë se emërimi i të punësuarit nga krimi, Ardi Veliut si koordinator zgjedhor në Vlorë. Veliu që u kthye në shofer personal të Klement Balilit, manipuloi provat për vrasjen e Pjerin Xhuvanit në Elbasan, gënjeu publikisht për materialet e krimit zgjedhor, manipuloi hetimin e vrasjes së Klodian Rashës, sulmoi nënën e një të mituri të dhunuar nga vetë policët.
Tani ky njeri do të “koordinojë” votat – një eufemizëm i hidhur për organizimin e vjedhjes së tyre.
Tragjedia e Martin Canit, 14-vjeçarit të vrarë pranë shkollës së tij, është bërë simbol i kësaj force të degraduar. Pesë ditë iu deshën policisë të “kujtohej” për kamerat e sigurisë. Ç’mund të presësh nga një forcë që ka shitur shpirtin te krimi?
Ministrat e Brendshëm ndërrohen si gjethet e vjeshtës – nga Taulant Balla tek Ervin Hoxha – por sistemi mbetet i paprekur. Hetimet me përgjime janë rritur 33%, duke zbuluar një rrjet të tmerrshëm korrupsioni ku një drejtues i lartë, dy të mesëm dhe 33 shefa sektorësh u kapën vetëm në 2024. Por këta janë thjesht “të pafatët” që nuk ditën të fshehin gjurmët mjaftueshëm mirë.
Rrethi mbyllet perfekt në prag të zgjedhjeve. Policët-milionerë do të shpërblejnë “investitorët” e tyre duke garantuar fitoren në kutitë e votimit. Edhe Gjykata Kushtetuese ka rënë pre e ndikimeve politike duke rrëzuar kërkesën e partive të vogla. Krimi mbron pushtetin, pushteti mbron krimin, policia numëron fitimet.
Kjo është policia e Shqipërisë së 2025-ës – një forcë që ka tradhtuar betimin e saj më të shenjtë: mbrojtjen e qytetarëve. Uniforma blu nuk është më simbol i rendit dhe sigurisë, por emblemë e një sistemi ku mbrojtësit e ligjit janë kthyer në ortakët më besnikë të krimit.
Sa thellë duhet të bjerë një forcë policore para se shoqëria të reagojë? Sa kohë do të vazhdojmë të tolerojmë një sistem ku ata që u betuan të na mbrojnë janë kthyer në kërcënimin më të madh për sigurinë tonë?
/gazetareforma.com
