Gazeta prestigjioze gjermane Frankfurter Allgemeine Zeitung raporton se qeveria shqiptare ka marrë vendim për të mbyllur rrjetin social TikTok për një vit, pas vrasjes tragjike të një adoleshenti.
Megjithatë, media gjermane nënvizon se vendimi mund të lidhet me zgjedhjet lokale që pritet të mbahen në maj.
Sipas raportimit, kryeministri Edi Rama njoftoi vendimin gjatë një takimi me mësues dhe prindër, duke deklaruar se TikTok, rrjet i njohur për popullaritetin e lartë te të rinjtë, do të mbyllet për të gjithë vitin 2025.
Ai shtoi se zbatimi i masës do të kërkojë gjashtë deri në tetë javë, duke e vendosur ndalimin efektiv në shkurt ose mars.
Statistikat tregojnë se në Shqipëri TikTok ka rreth 1.5 milionë përdorues, një përqindje shumë e lartë për një vend me 2.4 milionë banorë.
Megjithatë, kompania TikTok reagoi duke mohuar lidhjen me ngjarjen tragjike, duke sqaruar se videot që çuan në konfliktin fatal ishin postuar në një platformë tjetër.
Vendimi ka hasur kritika të forta nga opozita dhe shoqëria civile. Deputetja Ina Zhupa, përfaqësuese e Partisë Demokratike, e quajti masën “diktatoriale” dhe “një akt të rëndë të censurës dhe shpërdorimit të pushtetit kundër lirisë së shprehjes”.
Një koment në gazetën Tirana Times e cilësoi vendimin si një përpjekje për të ndaluar opozitën politike në prag të zgjedhjeve.
