Presidenti Bajram Begaj ka përcjellë urimet e tij për besimtarët e krishterë me rastin e Krishtlindjeve, duke nënvizuar rëndësinë e reflektimit mbi vlerat më të larta të njerëzimit.
“Në këtë ditë të shenjtë të Krishtlindjes dëshiroj të përcjell përshëndetjet dhe urimet më të përzemërta për ju dhe familjet tuaja.Krishtlindja kjo festë e ndritur që simbolizon lindjen e shpresës dhe paqe, na fton të ndalemi për një çast e të reflektojmë mbi vlerat më të larta të njerëzimit: dashuria, solidariteti, mirëkuptimin dhe faljen. Për të gjitha familjet shqiptare brenda dhe jashtë vendit uroj Krishtlindje të gëzuara, shëndet, paqe dhe lumturi”, tha presidentit”.
Kryeministri Edi Rama ka përcjellë urimet për Krishtlindje në mënyrë të veçantë, duke ndarë një postim në rrjetet sociale. Ai prezantoi ikonën e shekullit XVII, “Krishtlindja,” e punuar nga mësues Kostandini nga Vithkuqi i Korçës, e cila së fundmi është restauruar.
“MIRËMËNGJES dhe me këtë ikonë të saporestauruar, që na vjen si dëshmi arti dhe besimi që prej shek. XVII, ju uroj të gjithë besimtarëve të krishterë, Gëzuar Krishtlindjen”, shkruan Rama.
Kreu i Partisë Demokratike, Sali Berisha, ka përcjellë urimet e tij për besimtarët e krishterë me rastin e festës së Krishtlindjes.
“Gëzuar Krishtlindjen”, shkruan Berisha, duke e shoqëruar urimin me një foto të tijën së bashku me bashkëshorten, Liri Berisha.
“Bekimet e kësaj nate, për ju dhe më të dashurit tuaj miq! Gëzuar”,thuhet në mesazhin e kryedemokrati Sali Berisha.
Kreu i Partisë së Lirisë, Ilir Meta, i cili ndodhet i izoluar në burg, ka uruar besimtarët e krishterë për festën e Krishtlindjes. Në një postim në rrjetet sociale, Meta përcolli mesazhin e tij duke përdorur fjalë nga Bibla, duke theksuar frymën e shenjtë të festës.
“Dashuria është zemërgjerë, kërkon të mirën. Dashuria nuk ka smirë. Dashuria nuk gëzohet me padrejtësinë, por gëzohet me të vërtetën. Dashuria përballon gjithçka, beson gjithçka, shpreson gjithçka dhe duron gjithçka. Dashuria nuk shteron kurrë” – Bibël”, shkruan Meta.
